ILOILO CITY – Magapaguwa liwat sang Executive Order si Iloilo City Mayor Jerry Treñas may kaangtanan sa igapatuman nga curfew sa idalom sang General Community Quarantine.
Sa interview sang Bombo Radyo kay Treñas, iya ginpahayag nga sa subong, sundon anay ang 8:00 PM – 5:00 AM nga curfew apang mahimo nga sa masunod nga semana, ipatuman na ang 9:00 PM tubtub 4:00 AM nga curfew.
Suno kay Treñas, wala sang may na record nga insidente may kaangtanan sa una nga adlaw sang pagpatuman sang General Community Quarantine sa bug-os nga syudad sang Iloilo.
Ginpahayag ni Treñas nga ang returning residents ukon local strandees lang ang nagpalab-ot sang reklamo may kaangtanan sa ginapatuman nga border restrictions sa Capiz.
May kaangtanan diri, ginpahayag sang alkalde nga nakahanda siya nga maghatag sang letter of acceptance para sa returning residents apang kinahanglan nga magpakig-angot lang sa Iloilo City Government.
May kaangtanan naman sa reklamo tuhoy sa Social Amelioration Program, ginpahayag sang alkalde nga nagakadapat nga may yara anay sang imbestigasyon antes magdesisyon.
Sa pagpaathag sang natungdan, indi dapat magpadaso-daso sa pagbawi sang cash assistance kun wala sang due process.
