ILOILO – Interim Executive Order lamang ang ginpaguwa ni Gov. Arthur Defensor Jr. kun sa diin nakasaad nga magapabilin sa Modified General Community Quarantine ang bug-os nga probinsya sang Iloilo paglampas sang Hunyo 15.
Sa interview sang Bombo Radyo kay Defensor, iya ginpahayag nga ang iya ginpaguwa nga Executive Order ang pagpanghanda lamang sa tion nga indi makahatag sang deklarasyon ang National Inter-Agency Task Force tuhoy sa quarantine status sa bug-os nga pungsod.
Suno kay Defensor, ang pagasundon nga deklarasyon amo ang mandu sang National Inter-Agency Task Force ukon ni Presidente Rodrigo Duterte.
Ginpahayag ni Defensor nga magapabilin sa gihapon ang mga quarantine restrictions sa bug-os nga probinsya paglampas sang Hunyo 15 kun indi pa makapaguwa sang opisyal nga deklarasyon ang National Inter-Agency Task Force.
Kadungan sini, ginpanindugan ni Defensor nga limitado sa gihapon sa Locally Stranded Individuals kag repatriated Overseas Filipino Workers ang flight sa Iloilo International Airport.
Nahibalu-an nga ang Modified General Community Quarantine sa bug-os nga probinsya sang Iloilo ang magatapos kun tani subong nga Hunyo 15.
