ILOILO CITY – Gindali-dali lang ang pagdihon sang Executive Order (EO) nga ginpirmahan ni Presidente Rodrigo Duterte nga ginapahayag amo ang kasolbaran sang endo ukon kontraktuwalisasyon sa pungsod.
Sa interview sang Bombo Radyo sa law expert nga si Atty. Hector Teodosio, ginpahayag sini nga iya ginbasa ang kabug-usan sang Executive Order No. 51 apang natalupangdan niya nga madamo sang loopholes kag ang pila ka probisyon makatuga sang pagsalangisag.
Wala man ini sang nakita nga kasiguraduhan sa amo nga Executive Order, agud tapuson na ang problema sang kontraktuwalisasyon sa pungsod.
Imbes suno kay Atty. Teodosio nga makakuha sang simpatya sa mga mamumugon, mas makadugang pa ini sa pagsunggod sang amo nga sektor.
Dugang pa ni Teodosio, wala sang pulos ang EO bangud kaangay nga ginhambal sang amo nga Executive Order nga ginapasugtan ang contracting kag sub-contracting kun wala nagalapas sa kinamatarong sang mga empleyado.
Mas maayo pa suno kay Teodosio kun direkta na lang ginmandu sang Presidente nga untaton ang endo ukon ideklarar ini nga iligal.