ILOILO CITY – Nakahanda na ang Police Regional Office (PRO) 6 sa pagpatuman sang mandu ni Presidente Rodrigo Duterte nga pangdakpon ang mga nagagamit sang e-cigarettes ukon vape sa pampubliko nga mga lugar.
Sa ginpagwa nga memorandum sang Directorate for Operations sang National Headquarters sang Philippine National Police (PNP), ginamanduan ang tanan nga mga regional directors nga dumilian ang importation kag pag-gamit sang vapes.
Sa interview sang Bombo Radyo kay Pol. Lt. Col. Joem Malong, tagpamaba sang PRO 6, iya ginpahayag nga magasugod na sila sa pagpangdakop kag pagkaso sa mga nagalapas base sa Executive Order 26.
Dugang ni Malong, maga-pakig-angot sila sa iban nga ahensya, ilabi nagid sa Bureau of Customs, agud mapatuman ini.
Sila ang magapasa man sa national headquarters sang ila accomplishment report sa kada semana.
Nahibaluan nga Martes, Nobyembre 19, sang ginmandu ni Presidente Rodrigo Duterte ang pag-ban sang pag-gamit vape kag e-cigarettes sa publiko nga mga lugar kag ang pag-import sang mga ini.
