Ginalantaw sang Energy Regulatory Commission ukon ERC ang pagpanubo sang minimum nga konsumo sang kuryente halin 100 kilowatts pakadto sa 50 kilowatts sa 2027 agud mas madamo nga consumers ang makapili sang ila kaugalingon nga electricity supplier.
Ini matapos nga ginpanubo na sang ERC ang limit halin 500 kilowatts pakadto sa 100 kilowatts, kag subong ginakonsiderar naman ang pagpanubo sini sa 50 kilowatts.
Suno sa ERC, posible nga mapalapad ini tubtob sa household level, agud ang tanan ang may right of choice sa ila supplier sang kuryente.
Sa idalom sang Retail Competition and Open Access (RCOA), ang consumers nga naga-consume sang 100 kilowatts pataas kada bulan ang may kahigayunan nga makapili sang supplier.
Samtang, ang Retail Aggregation Program (RAP) ang nagabulig sa magagmay nga consumers nga magtipon sang ila konsumo sang kuryente agud maabot ang kinahanglanon nga limit.
Dugang pa, nagapati ang ERC nga posible maimplementar ang 50-kilowatt threshold sa 2027, samtang ginapaayo ang metering facilities sang mga distribution utilities kag electric cooperatives.
