ILOILO CITY -Ginhatagan sang Energy Regulatory Commission (ERC) sang provisional permit ang Panay Electric Company (PECO).
Ini apisar may bag-o na nga franchise holder agud mag suplay sang kuryente sa Syudad sang Iloilo.
Sa 13 ka pahina nga memorandum nga ginpagwa sang ERC, ginhatagan nila sang provisional certificate of public convenience and necessity (CPCN) ang PECO sa sulod sang two-year transition period tubtub magpagwa sang mando nga mahimo na i-take over ang pag suplay sang kuryente sa Syudad sang Iloilo sang More Electric and Power Corp. (More Power) nga ginapanag-iyahan sang bilyonaryo nga si Enrique Razon Jr.
Nahibaluan nga ang More Power ang wala pa sang power distribution assets sa diin padayon nila nga gina-away sa korte ang ila kinamatarong nga i-expropriate ang assets sang PECO.
Suno kay ERC chair and chief executive officer Agnes Devanadera, sa tion nga indi mahatagan sang provisional CPCN ang PECO, mahimo ini nga magresulta sa blackout sa Syudad sang Iloilo.
Gin-athag naman sang ERC nga ang paghatag nila sang provisional CPCN sa PECO ang wala nagakahulugan nga ginapalawig nila ang franchise sang kumpaniya.
Nahibaluan nga ang franchise sang PECO ang nag expired sang Enero 8 samtang ang CPCN naman sini ang natapos na sang Mayo 25.
Matandaan nga ginpirmahan na ni Presidente Rodrigo Duterte ang Republic Act No. 11212, nga nagahatag sang 25-year distribution franchise sa MORE power bilang masunod nga electric power provider sa Iloilo City.
Ginkalipay naman ni Marcelo Cacho, administrative officer, sang PECO ang paghatag sa ila sang ERC sang provisional CPCN.
Samtang, nagwangal naman si Roel Castro Chief Executive Officer (CEO) kag Presidente sang More Power, bangud sa delaying tactics nga ginhimo sang PECO.
Ginbulgar man sang More Power nga nagapakatig-a ang PECO nga ihatag ang ila assets bangud plano nila nga mag apply sang bag-o nga franchise sa 18th congress.
