OFFICE OF THE GENERAL COUNSEL,ENERGY REGULATORY COMMISSION
ILOILO CITY- Nagpasa ang Energy Regulatory Commission sang dated list sang assets sang Panay Electric Company sa Branch 35 sang Regional Trial Court sa Ramon Avancena Hall of Justice.
Ini ang kaangot sa nagapadayon nga expropriation case nga gin file sang More Electric and Power Corporation agud makuha ang tanan nga assets sang Panay Electric Company nga ginalakipan sang mga linya, softwares kag mga pasilidad.
Sa interview sang Bombo Radyo kay Atty. Arjay Louie B. Cuanan sang Office of the General Counsel sang Energy Regulatory Commission, iya ginpahayag nga nasambit nga mga dokumento ang nagadangat sa 700 ka pahina.
Nagaunod ini sang tanan nga mga assests sang Panay Electric Company nga ginalakipan sang personal kag real properties.
Suno kay Atty. Cuanan, mismo si Hon. Judge Daniel Antonio Gerardo S. Amular, presiding judge sang Branch 35 sang Regional Trial Court ang naghingyo sa Energy Regulatory Commission nga magpasa sang nasambit nga mga dokumento agud mahibaluan ang mga assets nga para sa
distribution system nga gamiton sa tion nga may matabo nga expropriation.
Nakadepende naman suno sa natungdan sa korte kun ano kadasig ukon kadugay ang dalagan sang kaso.
Gin-athag man ni Atty. Cuanan nga ang distribution business ang isa ka natural monopoly sa diin mas maayo nga isa lang ang distribution utility ukon electric power provider nga mahatagan sang prangkisa.
Nagakadapat man suno sa natungdan nga hulaton na lang ang resolusyon sang korte kun bala pahanugutan ang More Power nga i-expropriate ang assests sang PECO.
Ginmanduan man ni Judge Amular ang ERC nga hatagan sang kopya ang More Power kag Panay Electric Company sang dokumento nga ila ginpasa sa korte.
