Ginklaro ni Senator Francis “Chiz” Escudero nga kinahanglan sang 16 ka boto halin sa mga senador nga magahukom agud ma-convict si Vice President Sara Duterte sa impeachment trial.
Ginpahayag ini ni Escudero sa pagbukas sang trial kahapon sang hapon, Hulyo 6.
Kabahin ini sang iya opening statement matapos gin-eleher nga presiding officer sa proceedings.
Suno kay Escudero, klaro sa 1987 Constitution nga kinahanglan ang suporta sang 2/3 ukon 16 sa 24 ka senador agud may conviction nga matabo.
Amo ini ang kinahanglan nga numero sang boto suno sa iya bisan pa nga may tatlo ka senador nga indi makapartisipar sa trial. Ini bangud nagpalagyo si Senator Bato dela Rosa kasunod sang ICC arrest warrant; samtang gin-aresto naman sanday Senators Jinggoy Estrada kag Rodante Marcoleta bangud sa kaso nga plunder.
“The charter provides that the Senate shall be composed of 24 senators, without a tinge of doubt, two-thirds of the figure or not less than 16 members is an unquestionable compliance with the requisite number of votes mentioned in Section 21 of Article 7,” suno kay Escudero.
“It behooves, therefore, all of us, to observe the same fidelity to the Constitution, in this trial, which affects not only the mere ratification of a treaty, but more so affects the substantial rights of the respondent, as well as the sovereign will of the people as expressed in the overwhelming mandate given to her,” dugang sini.
Ginbasehan man ni Escudero ang isa ka nauna nga desisyon sang Korte Suprema nga nagasiling nga ang Konstitusyon nagakinahanglan gihapon sang 16 ka boto kun ginapangayo ang 2/3 sang bug-os nga 24 ka miyembro sang Senado.
Gindugang pa niya nga kun may mga senador nga indi mag-ugyon sa iya desisyon, mahimo nila ini nga dal-on sa Korte Suprema agud mangayo sang judicial relief.
Sa opening statement ni Escudero, gin-athag man sini nga wala siya naghingyo nga siya ang magakapot sang posisyon bilang presiding officer, apang bangud ginhatag ini sa iya, indi man siya magpalagyo sa amo nga responsibilidad.
Nahibaluan nga ginapaabot nga ang impeachment trial ni Vice President Sara Duterte magalawig sang mga 92 ka adlaw kag posible nga magpadayon tubtob sa temprano bahin sang 2027.#
