Madamo nga mga estudyante kag eskwelahan sa Western Visayas ang apektado bangud sa epekto sang Bagyo Crising nga may dala sang mabaskog nga ulan kag hangin sa rehiyon.
Sa interview sang Bombo Radyo kay Hernani Escullar Jr., spokesperson sang Department of Education (DepEd) Region 6, ginpahayag sini nga preparado na ang mga eskwelahan sa pagsabat sa epekto sang bagyo pinaagi sa pagpatuman sang module-based learning.
Suno kay Escullar, naglab-ot na sa 731,982 ka mga school learners ang apektado sa bug-os nga Region 6.
Pinaka-apektado nga mga probinsya amo ang:
Antique – 505 ka public schools kag 122,873 ka mga learners
Capiz – 352 ka eskwelahan kag 60,741 ka mga learners
Guimaras – 87 ka eskwelahan kag 27,059 ka mga learners
Province of Iloilo – 981 ka eskwelahan kag 323,229 ka mga learners
Iloilo City – 66 ka eskwelahan kag 75,010 ka mga learners
Ginpahayag ni Escullar nga umpisa kahapon nga adlaw, Hulyo 18, gin-shift na ang klase sa Alternative Mode of Learning agud nga mapadayon ang edukasyon apisar pa may kalamidad.
Suno sa iya, importante nga may preparasyon ang DepEd, ilabi na sa tion sang suspensyon sang klase bangud sa peligro nga dala sang bagyo.
Ginpabutyag man niya nga ini nga tikang ang kabahin sang seguridad para sa mga estudyante kag manunudlo.
