ILOILO CITY – Nag-apelar si Iloilo City Police Office (ICPO) officer-in-charge Chief Insp. Jovie Espenido sa mga Ilonggo nga indi pagdalian ang pagsaylo niya sa siyudad sang Iloilo.
Sa interview sang Bombo Radyo Iloilo, ginpahayag ni Espenido nga maghulat na lang ang mga Ilonggo bangud maabot gid siya sa husto nga ti-on.
Suno kay Espenido, nakalab-ot na kay PNP chief Police Director General Ronald dela Rosa kag kay Presidente Rodrigo Duterte ang iya kagustuhan nga magpabilin anay sa Ozamiz City.
Madamo pa siya sang talapuson sa Ozamiz suno kay Espenido bangud apisar nga napatay na si Mayor Reynaldo Parojinog, may nabilin pa ini nga mga tinawo nga wala pa nagkaladakpan.
Kinahanglan anay suno kay Espenido nga madakpan ang mga malain nga tawo sa Ozamiz antes niya bayaan ang lugar bangud naluoy siya sa mga pumuluyo sang nasambit nga siyudad nga nagapakitluoy sa iya nga indi maghalin.
Pamatuod ini suno sa chief of police nga maayo ang iya nahimuan sa siyudad sang Ozamiz.
Apang indi pa mahambal ni Espenido kun pila ka bulan antes niya matapos ang trabaho sa Ozamiz City.