Wala pa ma-fully turnover sang Department of Public Works and Highways sa Iloilo City Government ang Esplande 11 nga nahamtang sa Brgy. Progreso, Lapuz, Iloilo City, kun sa diin nakuhaan ang eskandalo ukon ang pagpanghilawas sang duha ka mga indibidwal.
Ini man ang isa sa mga rason kun ngaa wala naka-deploy sang mga green guards ang siudad sa nasambit ng area.
Sa interview sang Bombo Radyo kay Engr. Neil Ravena, head sang General Service Office, iya ginpahayag nga matapos ang hitabo, gilayon man nga naghulag ang siudad agud matinluan kag mamintinar ang Esplanade 11 para indi na magliwat ang eskandalo.
Suno sa iya, magakoordinar man ang siudad sa mga Barangay tanod sang Brgy. Progreso, Lapuz, agud marondahan ang area.
Dugang pa ni Ravena, naghatag man sang direktiba si Iloilo City Mayor Raisa Treñas agud butangan sang CCTV ang area, apang nahibaluan nga wala ini sang distribution line ukon talakdan sang kuryente bangud solar-powered ang tanan nga mga suga sa lugar.
Sa subong, magahatag man sang suhestyon si Ravena sa alkalde nga solar-powered CCTV na lang man ang igabutang sa nasambit nga area kun sa diin natabo ang kontrobersyal nga insidente.
Nagpanawagan man si Ravena sa publiko nga likawan kag untatan na ang pagpalapta sang nasambit nga eskandalo ilabi na nga yara pa sa menor nga pang-edaron ang babayi nga isa man ka estudyante.
Suno sa iya, ginatugyan naman nila subong sa City Social Welfare and Development ukon CSWD ang nasambit nga insidente, agud mahatagan sang nagakaigo nga igtalupangod.
