May tawo na bala nga nakatampuyong sa imo?
Masakit nga matampa ilabi na kun wala ka man sang sala… apang nakahibalo ka bala nga may mga tawo nga nagabayad para lang nga matampuyong sila bisan sa atubang sang publiko?
Popular ini nga slap service sa isa ka ilimnan sa Japan nga ginatawag nga Yotteba.
Kilala ang Yotteba sa ila manamit nga chicken wings kag barato nga beer, apang ang rason kun ngaa mas unique ang ila establisyemento amo ang espesyal nga serbisyo sa mga hubog nga customer.
Halin sang ginbuksan ini duha ka tuig na ang nagligad, ginpakilala nila ang serbisyo nga kilala sa locals bilang “binta” kun sa diin tampuyungon sang waitress ang customer para nga mamaras-masan sa kahulugbon antes sila magpauli.
Nagabayad ang customer sang P191 kag nagadugang pa sang P38 kun may specific staff member sila nga amo ang gusto nila ang magtampa sa ila.
Apang ini nga restaurant ang nagdesisyon nga untaton ini nga service sang damlag lang matapos nakabaton sang complaint halin sa isa ka customer nga ginaalegar nakaangkon sang injury bangud sa pagtampa sa iya duha ka bulan na ang nagligad.
Suno pa sa marketing official, daw lahog-lahog lang man kuntani nila ini apang nangin popular na, apang bangud may epekto naman ini sa ila nga reputasyon, nag-desisyon sila nga indi na ini paghimuon.
Nagadaku naman abi ang ila nga chain kag gusto sang management nga maayo ang ila nga imahe sa mga customer.
Nahibaluan nga magluwas sa Yotteba, may isa man ka ilimnan nga ginatawag nga Shachihoko-ya nga nagtanyag man sang kaangay nga serbisyo halin sang 2012 apang gin-untat sang COVID-19 pandemic kag wala na gintanyag liwat halin sang amo nga tion.
