ESTANCIA, ILOILO – Gin-athag sang mga otoridad nga indi mandu ni Estancia Iloilo Mayor Rene Cordero ang mga Maritime Group sang Philippine National Police (PNP) nga ginpahamtang sa Barangay Bayas sa nasambit nga banwa.
Sa interview sang Bombo Radyo kay Police Major Niño Amar, hepe sang Estancia Municipal Police Station , iya ginpahayag nga non-partisan ang kapulisan ukon wala naga-intra sa pulitika.
Suno kay Amar, ang rason sang pagpahamtang sang maritime group sa Barangay Bayas amo ang kakulang sang pulis sa Estancia.
Magluwas sini, nakabaton man siya sang impormasyon nga may yara sang mga barangay nga nakabaton sang kwarta halin sa mga kandidato.
Bangud sini, na desisyonan sang Estancia PNP nga i-monitor sang pulis ang tagsa ka mga kandidato sa pagka-alkalde aud nga mahibaluan ang aktibidad sang mga mayoralty candidates.
Ginapahayag nga nagadangat sa P500 tubtob P2,000 ang ginapanghatag sang mga kandidato sa Estancia.
Una na nga nagreklamo ang kampo ni Melinda Requinto nga nagapadalagan bilang alkalde sa pagpahamtang sang mga PNP Maritime Command sa Barangay Bayas kag ginatudlo ang kampo ni Mayor Cordero nga amo ang nagmandu nga butangan sang maritime group ang nasambit nga barangay.
