Nagpaathag ang Estancia Municipal Police Station nga hugot ang ila pagbantay sa mga iligal nga transaksyon sang armas-luthang sa ila banwa.
Ini kasunod man sang pagkadakop paagi sa entrapment operation sang Criminal Investigation and Detection Group (CIDG) sa anom ka mga indibidwal lakip ang ginapahayag utod sang isa ka Sangguniang Bayan Member sa Quinto Distrito.
Sa interview sang Bombo Radyo kay Police Major Marvin Buenavista, Hepe sang Estancia Municipal Police Station, iya ginpahayag nga bilang chief sang kapulisan sang Estancia, ginakalipay niya ang resulta sang nangin operasyon sang CIDG sa ila banwa.
Suno kay Buenavista, padayon ang ila nga monitoring sa pila ka puerto ukon pantalan sa banwa agud masigurado nga madakpan ang mga may tuyo nga magpasulod sang iligal nga armas-luthang.
Nagapakig-angot man ang talatapan sa Philippine Coast Guard (PCG), Philippine Drug Enforcement Agency (PDEA), kag sa Maritime agud mangin matalunsay ang pagbantay sa mga iligal nga aktibidad.
Nahibaluan nga apat ka de-kalibre nga armas-luthang ang nakuha sa anom ka indibidwal, lakip na ang isa ka salakyan, isa ka tricycle, kag duha ka mga motor nga gingamit sa ila transaksyon.
