ILOILO CITY- Tun-an sang maayo sang Iloilo City Government ang nagakatabo nga baligyaanay sang isda sa sulod sang Iloilo Fishing Port Complex.
Ini may kaangtanan sa madugay na nga reklamo sang mga fish vendors sa mga merkado publiko sa syudad nga indi na sila mabaklan bangud may nagaretail na sang isda sa sulod mismo sang fishing port complex.
Sa interview sang Bombo Radyo kay Iloilo City Councilor Ely Estante, chairman sang Committee on Market and Slaughterhouse, iya ginpahayag nga ginpatawag na niya para sapulon ang mga natungdan nga talatapan nga ginalakipan sang Local Economic Enterprise Office, tagdumalahan sang Iloilo Fishing Port Complex, Fisheries Development Authority, Licensing and Permit Division, kag Federation of Market Vendors.
Ini agud maistoryahan ang problema, makadihon sang win-win solution, kag makahimo sang rekomendasyon.
Lantawon man ni Estante kun posible nga maregulate sang syudad ang dalagan sang baligyaanay sa sulod sang fishing port complex.
