Ginpaandaman ni Senate President Pro Tempore Jinggoy Estrada ang National Bureau of Investigation (NBI) kag ang Philippine National Police (PNP) nga maapektuhan ang ila 2025 budget kun indi pa gid maaresto si Bamban, Tarlac Mayor Alice Guo ukon ang ginapahayag Chinese national nga si Guo Hua Ping.
Kadungan ini sa hearing sang Senate committee on women, children, family relations and gender equality kun sa diin ginkadismaya sang senador bangud Hulyo 11 pa ginpaguwa ang arrest order apang wala pa gihapon natultulan ukon nadakpan ang kontrobersyal nga alkalde.
Duha ka beses nga wala nagtambong si Guo sa hearings sang Senado sang ginapisa-pisa ini pamangkot sa iya kaangtanan sa iligal nga Philippine Offshore Gaming Operators (Pogo) sa Bamban tubtub nga sang ulihi naglab-ot na ang isyu sa iya identity.
Base sa monitoring sang Bureau of Immigration, wala pa nakaguwa sa Pilipinas si Mayor Guo apang may mga senador man nga nagasiling nga posible gingamit na sini ang iya Chinese passport agud makaguwa sa pungsod.
Ginpahayag man ni NBI Assistant Director Angelito Magno nga may reports sila nga nabaton nga nasiplatan si Guo sa Bulacan antes nagguwa ang arrest order apang sang ginkadtuan ang lokasyon, wala man ang amo nga opisyal.
Namunuhan man anay ni Senator Risa Hontiveros si Guo nga mas madamo pa ang ma-post sini sa Facebook apang wala man nagasipot sa Senate hearings. #
