ILOILO CITY – Nagpa-Bombo ang isa ka iloy matapos nagtuyo nga magpanginmatay ang iya anak bangud ginapahayag pilit nga ginpa-ako sang mga manunudlo nga nagabusong.
Sa interview sang Bombo Radyo kay Alyas Leni, iya ginpahayag nga nag-inom sang bleach ang iya anak pila lamang ka oras matapos ginkadtuan sang tatlo ka mga manunudlo sa ila balay sa isa ka banwa sa probinsya sang Iloilo kag pilit nga ginpa-ako nga nagabusong.
Ginpamangkot man nila ang nagaserbe guardian sang Grade 10 student kun may ginapasaka ini nga lalaki sa ila nga balay.
Suno kay Alyas Leni, gin-deny sang iya anak nga nagabusong ini kag sang nagpakonsulta sa ospital, napamatud-an nga sala ang akusasyon sang mga manunudlo.
Pahayag sang iloy, posible nga naapektuhan gid ang iya anak sa gin-ubra sang mga manunudlo kag wala man ini sang iban nga problema nga mahimo tuna-an sang iya tuyo nga pagpanginmatay.
Dugang pa niya, kuntani, ang mga guardian sang iya anak ang ginpatawag sang mga manunudlo kag gin-istorya sang maayo agud nga malaygayan ang estudyante.
Sang nagpadulong sila sa eskwelahan agud nga magreklamo, ginpahayag ni Alyas Leni nga ginhambalan sila sang principal nga magdemanda.
Indi man sila mahimo nga ma-atubang suno sa principal bangud nga wala sila nakapahibalo antes magkadto kag may yara sila sang ongoing nga school program.
Desidido ang pamilya nga magdemanda batuk sa tatlo ka mga manunudlo agud nga indi na mapamaresan sang iban.
Samtang, nagahulat nalang sang report kag official statement sang principal sang eskwelahan ang Department of Education- Schools Division of Iloilo.
Sa interview sang Bombo Radyo kay Mr. Leonil Salvilla, spokesperson sang Schools Division of Iloilo, iya ginpahayag nga sa tion nga mabaton na sang opisina sang Schools Division Superintendent ang sabat sang principal, magapatigayon sila sang imbestigasyon sa nasambit nga reklamo.
Dugang pa niya, magahatag man sang nagaka-igo nga bulig ang Schools Division of Iloilo sa estudyante kaangay sang psychosocial support.
[SUICIDE PREVENTION HOTLINE CENTER FOR HEALTH DEVELOPMENT – WESTERN VISAYAS]
1-800-10-333-8336
09985324047
09255469919
WVSUMC – 3202431 loc. 162 or 209
3292360
WVMC – 3211797 loc. 186
5037708
PMHU – 5298109
