Molo, Iloilo City – Nagapabilin sa gihapon sa evacuation center ang mga pumuluyo nga nadulaan sang balay sa natabo nga sunog sa Zone 3, Calumpang, Molo Iloilo City.
Sa interview sang Bombo Radyo kay Rosa Tropia, isa sa mga nasunugan, iya ginpahayag nga isa ini sa pinakamasubo nga paskwa bangud wala sila sang balay nga maistaran.
Nagpasalamat man si Tropia sa food pack, sleeping kag hygiene kit, family kit kag kitchen kit nga ginhatag sang Department of Social Welfare and Development agud makabulig sa ila.
Magluwas sa bulig halin sa Department of Social Welfare and Development, nagtanyag man sang bulig ang barangay kag City Social Welfare and Development Office sa mga apektado nga pumuluyo.
Nahibaluan nga may ara sang walo ka mga pamilya ang nagapabilin sa ICARE Center, isa ka pamilya sa day care center, kag ang 18 ka pamilya naman ang temporaryo nga nagtinir sa ila nga mga himata sa syudad.
Kahapon sang hapon sang natabo ang sunog nga naglab-ot sa 4th alarm.
