Ipaiway ang opisyal nga validation sang Road Clearing Operation sang Department of the Interior and Local Government (DILG).
Sa interview sang Bombo Radyo kay Iloilo City DILG Director Oscar Lim, iya ginpahayag nga ang pag-isol sang schedule sang validation ang santo sa mando ni DILG Undersecretary Jonathan Malaya.
Katuyuan sini suno kay Lim nga mahatagan pa sang dugang nga tinion ang mga Local Government Units (LGUs) sa pagpatigayon sang mga clearing sa kada barangay.
Suno kay Lim, wala pa sa gihapon mapat-ud kun sin-o ang magapatigayon sang evaluation kag kun ano ang basehan sa paghatag sang rate sa kada LGUs.
Sa subong suno sa natungdan, posible Enero 25 tubtob Peberero 5 patigayunon ang evaluation apang indi pa ini pinal.
Nahibaluan nga subong nga adlaw, Enero 18 tubtob 22 kuntani patigayunon ang validation sang nasambit nga clearing operations nationwide.
Sa pihak sini, gintuad sang Iloilo Provincial DILG nga ang isa sa dako nga problema nga ginalantaw sang LGUs sa pagpadayon sang clearing operations, amo ang illegal parking sa kada karsada.
Sa interview sang Bombo Radyo kay Iloilo Provincial DILG Officer Teodora Sumagaysay, iya ginpahayag nga padayon sa gihapon nga nagalibot ang ila team agud magpatigayon sang regular nga inspeksyon sa mga dalanon sa kada barangay sa Probinsya sang Iloilo.
Ginpakamalaot ni Sumagaysay ang mga pasaway nga drivers bangud sa padayon nga pag-illegal park sa mga dalanon.
Nagpanugyan man ang natungdan sa mga LGUs sang kabanwahanan nga solusyunan ang lapnagon nga illegal parking sa mga dalanon.
Ginapanawagan man sang natungdan ang mga LGUs nga may yara sang manubo nga compliance rate nga may yara pa sang tinion agud nga magtuman sa road clearing operation.
