ANTIQUE – Ginsabat ni Governor Rhodora Cadiao ang nagainit nga social media debate may kaangtanan sa iya hingyo sa Sangguniang Panlalawigan nga butangan sang official name nga Antique (Philippines) International Airport ang paluparan sa probinsya sang Antique.
Ang amo nga paluparan ang ginatawag man nga Evelio Javier Airport apang wala sang official name base sa rekord sang Sangguniang Panlalawigan sang Antique kag Sangguniang Bayan sang San Jose.
Sa interview sang Bombo Radyo kay Cadiao, iya ginpahayag nga wala sang malisya ang iya hingyo bangud mas maayo kun ma-refer ini sa iya official name para sa ‘additional funding requests’ kag para sa ‘further development’.
Ginpasa ni Cadiao ang iya hingyo sa Sangguniang Panlalawigan sang Marso 1.
Suno sa iya, wala siya sang tuyo nga kuhaan sang pangalan ang anay gobernador kag bantog nga baganihan sang Antique nga si Evelio Javier.
Sa pagkamatuod suno sa iya, may plaza, high school, barangay, gymnasium, kag upland area nga nakapangalan kay Javier.
Kuntani suno sa gobernador, indi lang paglaktan sang pulitika ang iya nga hingyo bangud wala man sang gamo sa iya kun Evelio Javier Airport ukon Antique International Airport ang pangalan sini basta ang importante OPISYAL ang pangalan nga dal-on.
