Ginhatagan sang conditional pardon ni Presidente Rodrigo Duterte si anay Antique Governor kag Rep. Jovito Plameras Jr.
Si Plameras ang na convict sa kaso nga graft sang tuig 2008.
Apang isa sa mga kondisyon agud mapatuman ang pardon amo nga dapat magbayad si Plamereas sang P2.65 million.
Sunu sa abogado ni Plamares nga si Atty Antonio Alcantara, isa sa mga rason sa pagpangayo nila sang conditional pardon sa presidente amo ang indi maayo nga sitwasyon sang ikaayong lawas sang anay gobernador nga sa subong naga edad sang 82 anyos.
Matandaan nga nagpagwa sang desisyon ang Sandiganbayan nga ma preso si Plameras sang 2008 sa diin napamatud-an nga may graft nga natabo sa pagbakal sang 2, 354 ka mga school desk kag 5, 246 nga mga arm chair sa idalom sang proyekto sang Department of Education, Culture and Sports (DECS).
Sunu sa korte, si Plameras ang nagpasugot nga magbakal sang nasambit nga mga school equipment apisar nga wala sang natabo nga bidding kag kulang ang nabakal nga mga school desk nga nagdangat lang sa 1, 294 kag 1, 838 lang ang nabakal nga armchair.
Nahibaluan nga wala napreso si Plameras sa New Bilibid Prison sa Muntinlupa City sa baylo gin hospital arrest lang ini sa Angel Salazar Memorial General Hospital (ASMGH).