Ginpamatbatan sang Korte Suprema ang disbarred lawyer nga si Larry Gadon kag subong Presidential adviser on poverty alleviation, nga guilty sa gross misconduct bangud sa perjury.
Ini ang kaangot sa sala sini nga akusasyon batok kay anay Chief Justice Maria Lourdes Sereno.
Bangud na disbar na, ginmanduan na lang Korte Suprema si Gadon nga magbayad sang P 150,000.
Magluwas diri, nadesisyunan man nga ini nga ineligible para sa judicial clemency kag mahimo nga mangin permanente na ang iya disbarment.
Ang desisyon ang kasunod sang reklamo nga gin-file sang Integrated Bar of the Philippines (IBP) sa Korte Suprema bangud sa sala nga impormasyon nga ginpagwa ni Gadon kaangot sa impeachment complaint sini batok kay Sereno sa House of Representatives.
Ginrekomendar sang Committee on Bar Discipline sang IBP ang duha ka tuig nga suspensyon ni Gadon matapos natukiban nga nagbinutig ini sang ginhambal niya nga ginpeke ni Sereno ang temporary restraining order (TRO) halin sa Korte Suprema.
Ginrekomendar naman sang Board of Governors sang IBP nga palawigon pa ang suspensyon sini sa tatlo ka tuig.
Gin-adopt naman sang Korte Suprema ang desisyon sang IBP, apang ginpasaka pa nila ini sa disbarment.
Apang, bangud na disbar na si Gadon, ang ruling sang Korte ang nagaapekto naman sa iya record kag gindagdagan sang financial penalty kag gindumilian nga makakuha sang judicial clemency.
Natukiban man sang Korte nga ang mga alegasyon ni Gadon sa iya impeachment complaint ang wala ginbase sa iya personal knowledge ukon authentic records, nga nagakontra sa iya ginsumpaan.
“Gadon knew he had no personal knowledge nor any authentic document to support the accusation that Sereno falsified a TRO of the Court. Yet, he still included this in his verified impeachment complaint, attempting to lend a semblance of credibility to his unfounded accusation,” pahayag sang Korte Suprema.
Nagapati naman ang Korte nga malisyoso ang katuyuan ni Gadon nga pakahuy-an si Sereno.
Una diri, gin-disbar si Gadon bangud sa iya derogatory remarks sa journalist nga si Raissa Robles sa social media.
Gin-suspend naman ini sadto sang Korte Suprema samtang naga-deliberate sa iya disbarment, kag sa ulihi, mayorya sang mga mahistrado ang nagboto nga ang mga akto ni Gadon ang eskandaloso kag nagapakahuya sa legal profession.
