CAPIZ – Ginpanginwala sang ex-boyfriend nga siya ang lalaki sa sex video scandal nga naglapta sa social media kaupod ang Sangguniang Kabataan Chairwoman sa probinsya sang Capiz.
Suno sa ex-boyfriend nga nagpahinago lang sa pangalan nga Franz, wala sang kamatuoran nga siya ang lalaki nga nakita sa video nga nagapakighilawas sa Sangguniang Kabataan Chairwoman.
Ginpahayag ni Franz nga siya ang lalaki sa isa sa mga video nga naglapta kun sa diin ginapatuad niya ang Sangguniang Kabataan Chairwoman kun sin-o ang third party sa ila relasyon.
Ginpanindugan ni Franz nga may mga abyan siya makapamatuod nga wala siya sang kahilabtanan sa pagpalapta sang nasambit nga mga video.
Sa pagkamatuod suno kay Franz, sang Enero subong nga tuig, nagpadulong siya sa Metro Manila kag sa malain nga palad, na-snatch ang iya cellphone.
Naglain ang iya buot suno kay Franz bangud wala gid nagpangayo sang pasaylo ang anay kahagugma nga amo ang nag-engganyo sa iya nga magtrabaho sa South Korea nga sa ulihi, natukiban nga isa ka illegal recruitment scam.
Gin-ako man sang natungdan nga ginpahog niya ang ex-girlfriend kasunod sang natabo apang kutub lamang diri ang iya mahimo.
Nakahanda nga magdepensa ang ex-boyfriend sa ano man nga panumbungon nga ipasaka sang Sangguniang Kabataan Chairwoman.
Nahibaluan nga ang ex-boyfriend mismo ang nagpakig-angot sa Bombo Radyo agud mapalayag ang iya bahin. (With report from Bombo Radyo Roxas)
