ILOILO CITY- Dakop sa entrapment operation sang Criminal Investigation and Detection Group (CIDG) ang isa ka barbero nga ginreklamo sang iya anay nobya bangud sa pagpangayo sang kwarta nga P1M kag pagpalapta sang “nude photos”.
Ang suspek amo si Francisco Boteja Jr. sang Cabatuan, Iloilo.
Sa interview sang Bombo Radyo kay PMaj. Jess Baylon, chief sang CIDG-Iloilo City, iya ginpahayag nga nagreklamo ang biktima sa ila talatapan nga nagapangayo ang barbero sang P1M bilang kabayaran sang apat ka tuig nga pagsagod sini sa iya anay nobya.
Apang, bangud indi masarangan sang tagreklamo nga bayaran ang amo nga kantidad, nagpangayo nalang ini sang P500, 000 kag “breakup sex”.
Dugang pa ni Baylon, ginpahog pa sang barbero ang tagreklamo nga patyon ini kag ang iya pamilya sa tion nga indi ini makabayad.
Pahayag dugang ni Baylon nga ginapalapta sang barbero ang mga stolen shots sang tagreklamo samtang nga naga-ilis ini.
Magapangatubang sang kaso nga Robbery Extortion, Grave Coercion kag Grave Threats ang barbero.
Ginpanginwala naman sang barbero nga nagapangayo siya sang kwarta kag nagapalapta sang nude pictures sang tagreklamo.
Suno kay Francisco Botaje Jr., frame up ang natabo bangud nga ginpakadto siya sang tagreklamo sa isa ka motel kag ginpadakop.
Indi niya ini mahimo sa tagreklamo bangud bisan buyayaw, wala ini nakatilaw sa iya.
Apat ka tuig ini nga nag-istar sa iya balay apang gintunto lamang siya sang tagreklamo bangud may relasyon pa ini sa amay sang iya bata kag nagpatindog sang balay kag nagbakal sang salakyan.
Ginpanginwala sang suspek nga nagpangayo siya sang kwarta nga P1M.
Suno sa iya, ang babayi ang nag-offer sang kwarta bilang kabaylo sang kalinungan nila nga duha.
Wala man niya ginpahog nga patyon niya ang tagreklamo kag ang pamilya sini.
Sang nagligad suno kay Boteja, nagkaon pa sila sa isa ka fast food chain kag ginpasikto niya kun bala seryoso ini sa iya kag nagpahayag nga pakaslan siya sini.
Nagahilibi-on nga ginsaysay sang tagreklamo ang iya inagyan sa anay nobyo nga si Francisco Botaje Jr.
Suno kay Alyas Ruffa, una na siya nga nagpasaka sang kaso nga paglapas sang cybercrime law apang nahinayan ini sa dalagan sang kaso.
Dugang pa niya, gin-send ni Botaje ang iya nude photos sa iya mga tiya kag mangin sa iya anay bana.
Mangin sa iya anak, gin-send niya ang mga nude photos kag ginlaragway kun ano ang gina-ubra nila nga duha kun sila lamang.
Ginpanginwala man ni Alyas Ruffa nga may relasyon siya sa iya anay bana kag ginpakay-o lamang ang ila balay para sa ila nga bata.
Suno kay Ruffa, siya pa ang naggasto sa pagpatahom sang barber shop ni Botaje.
Ginapahog ni Botaje ang tagreklamo nga kun indi niya mabaydan ang P1M, indi na siya maagahan.
