Nanindugan si anay Commission on Elections (COMELEC) chairman Andres “Andy” Bautista nga wala siya nagbaton sang anuman nga suhol halin sa Smartmatic ukon anuman nga entity.
Ini ang ginpahayag ni Bautista matapos ginkasuhan sang United States federal grand jury sa Florida bangud sa ginapahayag pagkuha sang suhol sa isa ka kumpaniya nga naghatag sang voting machine para sa 2016 elections sa pungsod.
Suno sa United States Justice Department, ang 60 anyos nga si Bautista ang nagapangatubang sang isa ka count sang pagpakighimbon sa pagpatigayon sang money laundering kag tatlo ka counts sang international laundering of monetary instruments.
Ginakasuhan man ang tatlo ka executives sang voting machine company para sa ila nangin papel sa ginapahayag pagpangsuhol kag money laundering scheme agud makakuha sang negosyo nga may kaangtanan sa 2016 Philippine elections.
Wala gintumod sang United States Justice Department ang kumpaniya, apang isa sa tatlo nga ginkasuhan amo ang executive nga si Roger Alejandro Pinate Martinez, 49, isa ka Venezuelan citizen kag Florida resident nga co-founder sang Smartmatic.
Nasaad sa akusasyon nga sa tunga-tunga sang 2015 kag 2018, sanday Pinate, Jorge Miguel Vasquez, 62, kag iban pa ang naghatag sang indi magnubo sa $1 million ukon P58 million nga suhol kay Bautista.
Sanday Pinate kag Vasquez ang ginapasakaan sang tag-isa ka count sang conspiracy to commit money laundering kag tatlo ka counts sang monetary instruments nga paglapas sa Foreign Corrupt Practices Act.
Sanday Bautista, Pinate, Vasquez, kag Elie Moreno, 44, dual citizen sang Venezuela kag Israel, ang ginkasuhan man sang ‘one count of conspiracy to commit money laundering’ kag ‘three counts of international laundering of monetary instruments.’
Sa tion nga mapamatud-an nga nakasala, ginpahayag sang Justice Department nga sanday Pinate kag Vasquez ang dagdagan sang maximum penalty nga lima ka tuig nga pagkapreso bangud sa paglapas sa Foreign Corrupt Practices Act.
“Bautista, Pinate, Vasquez, and Moreno each face a maximum penalty of 20 years for each count of international laundering of monetary instruments and conspiracy to commit money laundering.”
Samtang, ang Office of International Affairs sang Justice Department kag ang Philippine Department of Justice kag Office of the Ombudsman ang naghatag man sang dako nga bulig sa kaso.
Ang Fraud Section amo ang nag-imbestigar sa mga isyu sang Foreign Corrupt Practices Act kag Foreign Extortion Prevention Act.
Matandaan nga sang nagligad nga tuig, ang Smartmatic ang gindumilian sang Philippine Commission on Elections sa bidding sang election contracts apang ginbawai sang Supreme Court sang Abril.
Si Bautista nga nagpamuno sa election commission humalin sang 2015 tubtob 2017, ang naghatag sa Smartmatic sang $199 million P11.4 billion nga kontrata agud maghatag sang 94,000 ka voting machine para sa 2016 presidential election sa diin nagdaog sa piniliay si anay Presidente Rodrigo Duterte.
