ILOILO CITY – Patay ang isa ka lalaki matapos ginluthang sang riding in tandem nga mga suspek sa MV Hechanova Jaro District, Iloilo City.
Ang biktima amo si Elezer Galon, 31, kag residente sang Tanza Esperanza, Iloilo City Proper.
Sa interview sang Bombo Radyo kay Police Captain Mark Anthony Gesulga, hepe sang Jaro Police Station, iya ginpahayag nga tago ang itsura sang duha ka suspek sa diin lunsay nakasuksok sang jacket.
Nakuhaan man sa Close Circuit television (CCTV) camera ang insidente sa diin nakit-an nga gintiro sang duha ka beses si Galon sang isa sa suspek kag indi pa ini kuntento bangud ginpanaugan kag ginpalukpan sa liwat ang biktima.
Pahayag ni Gesulga nga sa ila inisyal nga imbestigasyon, natukiban nga naangot sang tuig 2016 si Galon sa isa ka buybust operation.
Naka-angkon sang pito ka igo sang bala ang biktima sa diin duha sa ulo kag lima sa lawas.
Dugang pa sang natungdan nga tatlo ka fire cartridge sang 45 calibre ang narecover sa krimen.
Sa subong, padayon pa ang imbestigasyon sang Jaro Police Station sa motibo sang insidente.
