ILOILO CITY – Ginkumpirma sang Commission on Elections- Iloilo City nga nag-inquire si former councilor Dr. Julie Baronda may kaangtanan sa 2023 Barangay elections.
Si Baronda ang iloy nanday Iloilo City Lone District Representative Julienne “Jam-jam” Baronda kag former Iloilo City Councilor Lady Julie Grace Baronda kag asawa ni Iloilo City Councilor Urminico Baronda.
Sa interview sang Bombo Radyo kay Mr. Jonathan Sayno, Election Assistant II, iya ginpahayag nga indi pa mapat-od subong kun magapadalagan gid man si Baronda sa nagahilapit nga eleksyon.
Magluwas kay Baronda, may yara sang mga bata-on nga mga abogado nga nagpabutyag sang interes sa barangay elections nga nagapamangkot na sa ila talatapan.
Sa subong suno kay Sayno, mahimo na nga ihanda sang mga aspiring candidates ang ila nga certificate of candidacy apang ang pormal nga pagbukas sang filing ang natalana sa Agosto 28 tubtob Setyembre 2.
Suno kay Sayno, ginalauman nga magalab-ot sa 7, 000 tubtob 8, 000 nga mga aspirants ang maga-file sang ila certificate of candidacy kag ginabulubanta 54 nga mga incumbent barangay officials nga magatapos na sang ila nga termino
Bangud nga may yara sang ongoing rehabilitation sa Iloilo Terminal Market kun sa diin nahamtang ang opisina sang Commission on Elections, hiwaton ang filing sang certificate of candidacy sa isa ka mall malapit man sa merkado.
