ILOILO CITY – Ginkumpurmihan ni anay Department of Environment and Natural Resources (DENR) Secretary Gina Lopez (DENR) ang pahayag ni Presidente Rodrigo Duterte nga “lobby money” ang naghulag rason nga napaslawan ini nga makalusot sa Commission on Appointments (CA).
Apang wala sang ideya ang anay tiglikom kun pila ang kantidad nga involve agud nga punggan ang iya pagpungko sa DENR.
Sa exclusive interview sang Bombo Radyo Iloilo, ginbalikan ni Lopez sanday Senators Panfilo Lacson kag Alan Peter Cayetano nga lunsay nagboto batok sa appointment sang anay tiglikom.
Suno kay Lopez, wala siya makalusot sa CA bangud nga ang lider sang contingent sang Kamara sa Commission on Appointments ang may kaangtanan sa mining industry apang wala direkta ginhingadlan kun sin-o ang ginatumod sini.
Ang nasambit nga personalidad suno kay Lopez, ang pinakadako nga contributor sa kampanya ni Cayetano sang nakaligad nga eleksyon kag sa building man nga ginapanag-iyahan sang amo nga personalidad, makit-an ang opisina ni Sen. Lacson.
Buwelta ini sang anay DENR chief kay Lacson matapos ginpahayag sang senador nga isa sa mga rason kun nga-a wala siya nagboto pabor kay Lopez, ang pgsulod sadto sang environmental advocate sa drug rehab facility kag ginpahayag pag-angkon sini sang personality disorder.
Una na ginpahayag ni Lopez nga “below the belt” na ang pagpersonal sa iya ni Lacson.
Samtang, nagapati man si Lopez nga may kahilabtanan ang pila ka miyembro sang gabinete ni Presidente Rodrigo Duterte sa pagharang sang iya appointment sa DENR.