ILOILO – Kinamatarong ni Iloilo 4th District Cong. Ferjenel Biron nga magpasaka sang election protest matapos nga nalutos sa gubernatorial elections batok kay Iloilo 3rd District Cong. Arthur “Toto” Defensor Jr.
Ini ang nangin reaksyon sang kaalyado ni Biron nga si anay Department of Health (DOH) Secretary kag subong Iloilo 1st District Congresswoman-elect Janette Garin.
Sa exclusive interview sang Bombo Radyo kay Garin, iya ginpahayag nga nakadepende kay Biron kun bala magapasaka siya sang election protest para sa manual recount ukon indi.
Ini bangud nga suno kay Garin, may yara sang kinamatarong si Biron nga magpasaka sang election protest agud nga matumod kun bala matuod gid man ang nangin resulta sang automated elections.
Sa pagpaathag ni Garin, madamu sang glitches sa nakaligad nga May 13 midterm elections kag mahimo nga ini ang isa sa mga rason sang pagkwestyon ni Biron.
Tuhoy naman sa resulta sang survey bag-o ang eleksyon, ginpahayag ni Garin nga santo sa iya nga pagpangusisa sa survey firm, ang resulta sa gubernatorial elections lamang ang wala nagsanto kag ini ang subong pa lang natabo.
Sa pihak sini, ginpahayag sang incoming Congresswoman nga iya gid nga ginatahod si Biron nga gilayon nga nag-concede kag maisog nga nagpasaka sang election protest matapos ang midterm elections.
