ILOILO CITY – Ginatun-an ni anay Health Secretary Janette Garin ang pagpasaka sang kaso batok sa anay consultant sang Department of Health nga si Dr. Francis Cruz.
Kasunod ini sang akusasyon ni Cruz nga kabahin ang anay tiglikom sa kuno “mafia” sa sulod sang ahensiya nga ang tinutuyo manguwarta sa mga proyekto sang DoH.
Sa interview sang Bombo Radyo Iloilo, ginpahayag ni Garin nga nagpakig-angot na ini sa iya mga abogado agud tun-an kun ano ang kaso nga mahimo ipasaka batok kay Cruz nga consultant ni anay Health Sec. Paulyn Ubial.
Ginkuwestyon sang anay tiglikom ang kredibilidad ni Cruz bangud indi man ini kilala nga expert suno kay Garin kag wala man magtrabaho sang malawig sa DoH.
Nagapati si Garin nga ang expose ni Cruz agud itum-ok siya kag ang iban pa nga opisyal sang ahensiya, ang kahimuan ni Ubial.
Isa si Cruz suno kay Garin sa plano sadto ni Ubial nga ibutang bilang undersecretary ukon assistant secretary sang DoH apang wala magmadinalag-on matapos ini na-bypass sang Commission on Appointments.