ILOILO – Ginkadlawan lang ni anay Health Secretary kag subong Iloilo 1st District Rep. Janet Garin ang akusasyon batok sa iya ni Public Attorney’s Office (PAO) chief Atty. Persida Acosta nga nagapamalay-balay ini sa media para iduso ang pagbalik sang dengvaxia vaccine samtang ginasumpa ini sang ginikinan sang mga napatay bangud sa nasambit nga bakuna.
Sa interview sang Bombo Radyo Iloilo kay Rep. Garin, iya ginpahayag nga indi mahimo nga maghipos lamang siya bangud bilang isa ka doktor kag vaccinologist, mas mapaathag niya sa publiko ang tuhoy sa bakuna.
Suno sa mamalidha, luyag lamang ni Acosta nga pahipuson siya agud ma-solo sang PAO chief ang pagpalayag sa media nga suno pa sa mamalidha, lunsay kabutigan kag patalang lang ang ginabuy-an nga mga pahayag ni Acosta.
Dugang pa ni Garin, mas nagakadapat nga pamatian ang World Health Organization nga nagasiling nga wala sang nagakapatay sa bakuna sa baylo nga pamatian si Acosta nga isa ka abugado kag wala man sang nagakaigo nga ihibalo tuhoy sa dengvaxia vaccine.
