ILOILO – Ginpanginwala ni anay Department of Health (DOH) Secretary kag subong Iloilo 1st District Congresswoman-elect Janette Garin nga may yara sang tagtaganay sang kwarta sa tunga sang mga mamalidha may kaangtanan sa pagpili sang house speakership.
Ini ang kasunod sang huring-huring nga may yara sang P500,000 tubtub P1 million nga ginapanghatag ang mga interesado nga magpapili bilang House Speaker agud nga magdaug.
Sa exclusive interview sang Bombo Radyo kay Garin, iya ginpahayag nga sa iya bahin, wala siya sang may nabaton nga kwarta gikan sa kasubong niya nga mamalidha.
Sa pagkamatuod suno kay Garin, makapila na sila ka beses nga nagpatigayon sang pagsinapol sang Nacionalista Party (NP) apang lunsay lamang ‘get together’ ang natabo kag wala sang tagtaganay sang kwarta.
Gin-ako man ni Garin nga iya man nga nabati-an ang tuhoy diri apang indi man niya makumpirma kun bala ini ang matuod ukon indi.
Ginpahayag ni Garin nga sa ila grupo, si Taguig-Pateros first district Cong.-elect Alan Peter Cayetano lang ang nagpabutyag sang interes nga mangin House Speaker.
Sa subong suno sa incoming Congresswoman, ginahulat pa kun bala may yara sang iga-endorso si Presidente Rodrigo Duterte agud nga mangin House Speaker.
