ILOILO CITY – Nagapanawagan si anay Department of Health Secretary kag subong Iloilo 1st District Rep. Janette Garin sa Department of Health nga magsabat sa mga peke nga mga impormasyon nga nagaguwa may kaangtanan sa 2019 Novel Coronavirus.
Sa interview sang Bombo Radyo kay Rep. Garin, iya ginpahayag nga kinahanglan man nga sabton sang Department of Health ang mga fake news nga nagatuluhaw agud nga indi mag-panic ang mga pumuluyo sa pungsod.
Ginalantaw man ni Garin nga sala ang nangin sabat ni Department of Health Secretary Fracisco Duque III nga kinamatarong sang mga eskwelahan ang pagsuspende sang ila mga klase bangud nagahatag ini sang kakugmat sa mga pumuluyo kun ngaa ginakansela ang klase sa pipila ka mga buluthuan.
Ini ang nagapabilin nga kwestyonable sa paminsaron sang tawo bangud kinahanglan nga mismo ang Department of Health nga otorisado agud ipahibalo sa tanan kun ano ang nagakatabo.
Suno kay Garin, kuntani wala man ginasapubliko ang mga pangalan sang mga ospital sa diin gina obserbahan ang mga pasyente nga may sintomas sang Coronavirus bangud nagahatag man ini sang kakugmat sa mga pumuluyo sa diin mahimo nga indi ang mga ini magpadulong sa amo nga hospital bangud sa pagdumdom nga may yara sang virus.
Pahayag niya, ang paghiwat sang command conference ang makabulig man sa pagpalapnag sang insakto nga impormasyon sa mga pumuluyo sa diin kinahanglan nga makig-angot adlaw-adlaw ang ahensya sa mga direktor sang hospital kag mga regional director sang Department of Health.
Ang hospital director ang magahatag sang update kun bala ano na ang sitwasyon sang mga pasyente nga nagabatyag sang sintomas sang virus kag ang mga regional director ang magapadulong sa mga opisyal sa local government unit agud ipahibalo ang nagakatabo.
Sa pihak sini, ginpasalamatan man ni Garin ang Department of Health sa pagpabor nga indi lamang sa mga pasahero nagikan sa China ang hatagan sang health declaration checklist form kundi amo man sa nagkalain-lain nga mga pungsod agud mahibaluan kun ano nga lugar ang ila ginhalinan kag mahibaluan ang ila tagsa ka mga health status.
