ILOILO – Isa ka daku nga kabutigan para kay anay Department of Health Sec. kag subong Iloilo 1st District Rep. Janette Garin ang pagpasaka sang kaso kriminal ni Senate Blue Ribbon Committee Chairman Sen. Richard Gordon may kaangtanan sa ginapahayag maanomaliya nga paggamit sang pondo sang Philippine Health Insurance Corporation (PhilHealth).
Sa exclusive interview sang Bombo Radyo kay Garin, iya ginpahayag nga wala sang kamatuoran ang akusasyon batok sa iya kag kanday anay Department of Budget and Management Sec. Florencio Abad kag anay PhilHealth President Alex Padilla.
Suno kay Garin, ang P10.6 billion nga ginatumod ni Gordon ang non-existent bangud madamo ang kurapsyon sa ahensya kag natukiban lamang ang tuhoy diri sang nagpatigayon sang audit ang Malacañang.
Ginpahayag ni Garin nga sang siya pa ang DOH Secretary kag chairman sang PhilHealth Board of Directors, natukiban niya nga wala nagasanto ang mga data ilabi na kun finances ang pagahambalan.
Ang nagaguwa sa subong suno sa natungdan amo nga ginapatalang lamang ang publiko agud nga matabunan ang matuod nga nagakatabo sa gobyerno kag ang daan nga administrasyon ang ginabasol.
Sa pihak sini, ginpahayag sang mamalidha nga wala siya nahadlok kag nakahada siya nga mag-atubang sa imbestigasyon.
Ginpanindugan sang anay DOH Secretary nga si PhilHealth President Ricardo Morales ang pamatuod nga may yara sang anomaliya sa nasambit nga ahensya.
Sa pagpaathag ni Garin, nag-umpisa sa pagtimbook sang numero sang anomaliya sang siya ang nagbiya sa pwesto kag nagbulos ang bag-o nga administrasyon.
May kaangtanan sa pagpahalin kay Morales sa pwesto, ginpahayag ni Garin nga nakadepende na ini kay Presidente Rodrigo Duterte.
