ILOILO CITY – Ginpasakaan ni anay Health Sec. Janette Garin sang kaso nga libel ang pila ka personalidad nga nagatum-ok sa iya may kaangtanan sa kontrobersiya sa Dengvaxia vaccines.
Apat ka counts sang libel ang ginpasaka ni Garin batok kanday anay Health Sec. Paulyn Jean Ubial sa Iloilo City Hall of Justice.
Kaangay man nga kaso ang ginpasaka ni Garin batok kay Dr. Francisco Cruz nga anay consultant ni Ubial.
Kun madumduman, si Cruz ang nagbuyagyag sa ginapahayag mafia sa sulod sang DoH.
Ginkasuhan man ni Garin sang libel sanday anay Health Undersecretary Ted Herbosa kag anay miyembro man sang dengue expert panel sang DoH nga si Dr. Anthony Leachon.
Ika-duha na ini nga kaso nga ginpasaka ni Garin batok kay Ubial kun sa diin sang nakaligad lang nga bulan nagpasaka man si Iloilo First District Rep. Richard Garin sang kaso batok sa anay tiglikom.
May kaangtanan ini sa akusasyon ni Ubial nga gin-pressure siya sang mamalidha agud magbakal sang Dengvaxia vaccines sang siya pa ang tiglikom sang DoH.