Isa sa una nga nagpakilig sa 90s kids amo ang pares nanday Marvin Agustin kag Jolina Magdangal.
Matapos ang 25 ka tuig, kumpirmado nga maga-updanay liwat ang duha sa pelikula nga “Ex Ex Lovers” sa idalom sang direksyon ni JP Habac.
Maga-upod man sa sini nga movie ang actor-singer nga si Juan Karlos kag si Loisa Andalio.
Suno kay Marvin, daw pang-real life gid ang ‘Ex Ex Lovers’ bangud mag-ex gid man sila nga duha — bagay nga ginkadlawan lamang ni Jolina.
Ginlaragway naman ini sang actress nga isa ka “dream project” bangud nagsugod nga maistoryahan ang reunion movie sa tunga nila halin pa sang 2018 sang ginpanumdom ini nanday Direk Dan Villegas kag Tonet Jadaone.
Wala pa subong sang release date kag dugang nga mga detalye nga ginpaguwa.
Kilala ang Agustin-Magdangal tandem nga “MarJo” kag nangin bida sa “Flames: The Movie” (1997), “Labs Kita Okey ka Lang?” (1998), “Kung Ayaw Mo Huwag Mo” (1998), “Hey Babe!” (1999) kag “Gimik: The Reunion” (1999).
Si Direk JP nga kaupod nanday Jolina kag Marvin ang kilala sa iya mga obra nga “I’m Drunk, I Love You” (2017) kag “Love You Long Time” (2023), kag ang web series nga ‘Gaya sa Pelikula.’
