Ginapahayag nga nakapakig-angot pa ang ex-girlfriend ni Frank Rois Barbasa nga luyag sini makig-istorya sa iya inadlaw antes nasapwan ang isa ka sunog nga bangkay sa Phase 3, Green Meadows Subdivision, Brgy. Ungka I, Pavia, Iloilo.
Santo ini sa panaysayon ni Ray Rico, ang malapit nga abyan sang pamilya Barbasa.
Si Frank Rois amo ang 23-anyos nga tumandok sang Capiz apang temporaryo nga nagatinir sa La Paz. Isa siya ka nursing student sa isa ka unibersidad sa Iloilo City. Siya ang tag-iya sang I.D. kag pila ka kagamitan nga nakita malapit sa lugar kun sa diin nasapwan ang sunog nga bangkay.
Sa interview sang Bombo Radyo kay Ray Rico, iya ginpahayag nga ma-overnight kuntani si Frank Rois sa balay sang iya abyan sa Pavia antes magpauli sa Roxas apang alas syete sang gab-i sang Martes, Abril 28, naglisensya ini nga mapadulong sa GT Mall kag ginbilin sini ang iya bag sa iya nga classmate.
Ulihi naman ini naka-komunikar ang tiyo sa Germany pasado ala una sang kaagahon sang Myerkules, Abril 29, nga nagapanugid natuhoy sa iya nga test kag kumpletuhon nga duty bangud manug-gradwar na ini sa kolehiyo.
Pasado ‘las 4 sang kaagahon sang amo man nga adlaw sang may nasapwan nga sunog nga bangkay sa Ungka I, Pavia.
Taga-Green Meadows man ang anay kahagugma ni Frank.
Base sa kapulisan, nag-break na ang duha ginabulubanta Enero ukon Pebrero sang sini nga tuig bangud sa gina-alegar nga third party.
Sang nagkoordinar naman ang kapulisan sa ex-girlfriend ni Frank Rois, ginapahayag nga wala na ini naghatag pa sang statement apang ginapahayag nga nangin emosyonal sang nakit-an sini ang picture sang sunog nga bangkay.
Sandig sa kapulisan, may naka-mensyonar nga duha ang cellphone ni Frank Rois.
Isa lang ang na-recover sa area nga yara naman sa kustodiya sang pulis kag isa sa ginalantaw nga makabulig sang daku pananglitan mabuksan na sang awtoridad.
Na-recover ang cellphone 70-80 metros ang distansya halin sa nasapwan nga sunog nga bangkay. Guba na ang cellphone kag ginaalegar nga wala sang sim card. Indi pa matumod kun guba na ini nga daan ukon ginhungod nga gin-guba kag ginkuhaan sang sim card ang cellphone agud indi na makuhaan pa sang impormasyon.
As of press time, wala pa nakakontak si Frank Rois sa iya mga pamilya kag abyan. Wala pa man sang kumpirmasyon sa identity sang bangkay.#
(via Bombo Phauline Pillora)
