Nabulgar sa quad committee hearing sa Kamara ang mga tawo nga nagsugo agud patyon si former Iloilo City Police Office (ICPO) Director kag Philippine Charity Sweepstakes Office (PCSO) board secretary Police Col. Atty. Wesley Barayuga.
Suno kay former Negros Occidental Director Police Lt. Colonel Santi Mendoza, sanday alleged Davao Death Squad (DDS) implementer kag former PCSO General Manager and Vice-Chairperson Retired Police Col. Royina Garma kag National Police Commission Commissioner Col. Edilberto Leonardo ang sa likod sang pagpapatay kay Barayuga.
Gin-ako ni Mendoza nga ginhatagan siya sang P40,000.00 bilang padya sa pagpapatay kay Barayuga.
“Sinabi ko kay Sir Leonardo na dahil opisyal ng gobyerno ang target, mahalagang magsagawa ako ng sarili kong beripikasyon. Ngunit sabi nya, hindi na kinakailangan dahil ang utos ay mula kay GM Garma… na may personal na kaalaman sa mga ilegal na aktibidad ni Wesley Barayuga.”
Kun balikan, gin-ambush si Barayuga sang riding in tandem suspects samtang nagasakay sang iya puti nga pick-up truck sa corner sang Calbayog kag Malinaw streets sa Mandaluyong City sang Hulyo 30, 2020.
Gintudlo nga isa man sa mga rason sa pagpapatay sa iya amo ang kaangtanan sini sa iligal nga droga.
Nalakip man ini sa “narco list” ni former President Rodrigo Duterte.
Nagserbe ini bilang director sang ICPO sa sulod sang duha ka tuig humalin sang 2006 tubtob 2008.
Nangin deputy regional director for operations man ini sang Police Regional Office 6.
Sang 2012, ginpamunuan sini ang Task Force Armas sa Western Visayas.
Tuig 2013, nagpungko ini bilang executive officer for the Directorate for Logistics sa Camp Crame.
