Napasakaan na sang duha ka separado nga kaso ang anay director sang Iloilo City Police Office (ICPO) kag subong Chief sang Regional Staff sang Police Regional Office (PRO) VI matapos gintudlo nga utok sa pagpatay sa isa ka call center agent kag ginatudlo man nga nagmanipula sa pagpatay sa anak sang isa ka kongresista.
Sa interview sang Bombo Radyo kay former Iloilo assemblyman kag Banat Partylist representative Atty. Salvador ‘Buddy’ Britanico, iya ginpahayag nga gin-ako ni Police Corporal Joseph Andrew Poneles Joven nga si Police Colonel Martin Defensor ang mastermind sa pagpatay kay Allain Muller sa Cuartero, Jaro, Iloilo City sang Enero 19, 2020.
Matandaan nga base sa imbestigasyon sang National Bureau of Investigation (NBI), una na gintuad ni Police Corporal. Joven, nga siya mismo ang nagserbe nga driver sang Mitsubishi Adventure bilang get-away vehicle sa pagpatay kay Muller kag anak ni Britanico nga si Delfin.
Gintuad man ni Joven nga lakip man sa mga pulis nga nagpatay sa duha ka mga biktima amo sanday Police Staff Sergeant Ricardo Cabrera Morante kag Police Master Sergeant Vernie Lui Escorial.
Si Escorial ang una na gintumod ni Joven nga nagluthang-patay kay Delfin sa Iloilo River Boulevard sa Bgy. Nabitasan, La Paz, Iloilo City sang amo man nga adlaw nga ginpatay si Muller.
Suno kay Britanico, gin-ako man ni Joven nga ginhatagan sila lakip na ang ila pamilya sang suhol nga kwarta ni Police Corporal Defensor agud nga magpalagyo kag i-panginwala ang kaangtanan sa kamatayon ni Delfin.
Agusto 18, 2021 sang ginpasakaan si Defensor sang kaso nga murder angot sa kamatayon ni Muller.
Hulyo, 8, 2021 naman sang ginpasakaan ang nasambit nga pulis sang kaso nga ‘Principal by inducement’ sa pag-akto bilang accessory ukon pagmanipula sa kamatayon ni Delfin Britanico.
Magluwas kay Defensor, ginpasakaan man sang kaso ang iban pa nga mga pulis nga naangot sa twin shooting incident.
Nahibaluan nga si Britanico mismo ang nagakapyot sang kaso ni Muller matapos matul-id nga naga-angot diri ang kaso sang pagpatay sa iya anak.
