ILOILO CITY – Hulaton ni anay Iloilo City Councilor Plaridel Nava ang sabat sang anum ka mga elected official sang syudad sang Iloilo may kaangtanan sa ila ginpasaka nga reklamo sa Office of the President.
Ini ang kasunod sang ginpaguwa nga order ni Deputy Executive Secretary for Legal Affairs Ryan Alvin Acosta nga nagamandu kanday Iloilo City Councilors Love-Love Baronda, Jay Treñas, Ely Estante, Liga ng mga Barangay President Irene Ong, Sanguniang Kabataan (SK) Federation President Leila Luntao kag Vice Mayor Jeffrey Ganzon nga magsabat kun nga-a nag-boycott sila sa ginpatigayon nga sesyon agud kun tani ideklarar ang State of Calamity bangud sa kakulang sang tubig bangud sa El Niño.
Sa interview sang Bombo Radyo kay Nava, iya ginpahayag nga may yara sang 15 ka adlaw ang mga nasambit nga opisyal nga magsabat kun nga-a dululungan sila nga nag-absent kag nagpasa sang leave kadungan sang ila sesyon sang Abril 23, 2019.
Suno kay Nava, wala na sang isyu ang tuhoy sa pagdeklarar sang State of Calamity sa syudad sang Iloilo sa baylo, ang isyu suno sa konsehal amo ang indi pagtambong sa sesyon sang iya mga kaupod nga opisyal.
Sa pagkamatuod suno kay Nava, indi lamang ang State of Calamity ang isyu sang mga nakaligad nga bulan kundi lakip na diri ang pagpasar sang pondo sa tagsa ka mga barangay kag ang paghatag sang prangkisa satricycle drivers.
Bilang elected official, ginpahayag sang konsehal nga katungdanan nila ngamagtambong sa sesyon, isa ka bes sa isa ka semana.
Magluwas diri, ginpahayag man niya nga kasubong nga ginhungod sang mga kaupod nga opisyal ang pag-leave agud nga indi mapasar ang mga agenda.
Sa pihak sini, ginpahayag sang anay Iloilo City Councilor nga wala nila ginapamulitika ni anay Iloilo City Councilor Joshua Alim ang anum ka mga opisyal sa baylo, luyag lamang nila nga maathagan sa natabo nga pag-boycott sa nabilin nga sesyon sa idalom sang Espinosa administration.
