ILOILO CITY – Nagpaandam ang kontrobersyal nga si former Iloilo City Mayor Jed Patrick Mabilog nga pasakaan sang kaso si acting Iloilo City Mayor Jeffrey Ganzon.
Si Ganzon ang nagapungko nga alklade sang syudad bangud wala sa gihapon nakabalik si loilo City Mayor Jerry Treñas nga sa subong, nagaapaayo pa sa hospital sa Metro Manila matapos nagpaidlaom sa bile duct operation.
Sa interview sang Bombo Radyo kay Mabilog, iya ginkumpirma nga kaso nga libel ang iya ipasaka kay Ganzon.
Suno kay Mabilog, nahibaluan na ni Ganzon nga pasakaan siya ang kaso kag ginahulat na lang niya ini.
Wala naman ginpalayag sang anay alkalde ang rason sa pagpasaka sini sang kaso kay Ganzon.
Matandaan nga sa ginpatigayon nga proclamation rally sang Team Sulong Gugma kahapon, ginpahayag ni Mabilog nga personal niya nga gin-endorso si former City Councilor Lady Julie Grace “Love-Love” Baronda agud makasumpong ni Ganzon nga mapadalagan bilang Vice Mayor sa masunod nga eleksyon.
Nahibaluan nga sang 2017 sa tunga-tunga sang drug war sang Duterte administration, gintudlo ni former Iloilo City First Lady Maria Victoria Mabilog si Ganzon nga amo ang nagaguba sang pangalan sang iya bana kay former President Rodrigo Duterte.
