ILOILO CITY – Ginkasuhan na sang Ombudsman sa Sandiganbayan si anay Iloilo Fifth District Rep. Neil Tupas Jr.
Kaso nga multiple counts sang graft kag malversation of public funds ang ginpasaka batok sa anay mamalidha.
May kaangtanan ini sa P4.85 million nga Priority Development Assistance Fund (PDAF) ni Tupas sang mamalidha pa ini.
Ginapahayag nga ginhatag sang anay mamalidha sa non-government organization nga Kalusugang Alay sa Masa Foundation Inc. ang amo nga kantidad para sa pagpatuman sang livelihood projects sang Fifth District sang Iloilo kag wala nag-agi sa public bidding.
Suno sa Ombudsman, indi kwalipikado kag indi accredited ang amo nga foundation para magpatuman sang proyekto.
Depensa naman ni Tupas, nasorpresa siya sa kaso bangud wala man siya maabisuhan sang Ombudsman angot sa kaso kag wala siya mahatagan sang oportunidad nga depensahan ang kaugalingon.
Ini apisar nga sang Hulyo pa sang nakaligad nga tuig nagpaguwa sang notice ang Ombudsman batok sa iya.
Liwat ginpanindugan ni Tupas nga ginpeke ang iya pirma sa amo nga mga papeles kag siya pa kuno mismo ang nagpahibalo sa Ombudsman angot sa maanomalya nga paggamit sang iya pirma.