Mayor Frankie Locsin
JANIUAY, ILOILO – Nagpakatig-a si anay Janiuay, Iloilo Mayor Frankie Locsin nga batunon ang pamatbat sang Korte Suprema may kaangtanan sa paglapas sini sa Republic Act 3019 ukon Anti-Graft and Corrupt Practices Act.
Nahibaluan nga ginpamatbatan sang Korte Suprema si Locsin sang perpetual disqualification kag pagkapreso sang 6 ka tuig kag isa ka adlaw tubtub 10 ka tuig.
Ini ang nag-ugat sa pagbakal sang bulong nga nagabalor sang P15 million sang nagapungko pa ini bilang alkalde sang banwa sang Janiuay.
Suno kay Locsin, santo sa iya pag-usisa sa abogado nga si Atty Rene Villa, ang pamatbat ang mangin epektibo lang sa tion nga mabaton na sang magtimbang nga bahin ang kopya sang desisyon sang Korte Suprema nga sa subong wala pa sa gihapon nila nabaton.
Magluwas sini, may yara pa sang unresolved nga motion for reconsideration si Locsin sa nasambit nga kaso.
Gin-athag man sang anay alkalde nga ang Commission on Elections (Comelec) lang ang maka disqualify sa iya.
Samtang, ginpahayag naman ni Vice Mayor Jojo Lutero nga indi na kinahanglan pa sang order sa disqualification sang Comelec.
Sa interview sang Bombo Radyo kay Lutero, iya ginpahayag nga pinal na ang desisyon sa Korte Suprema kag ang COMELEC amo ang magapatuman sini.
Maathag suno kay Lutero nga wala na sang kinamatarong si Locsin nga magpadalagan ukon mag boto.
Makabig naman suno kay Lutero nga wala na sang kabilinggan ang mangin resulta sang boto ni Locsin sa tion sang eleksyon.
Si Lutero ang isa sa mangin kasumpong ni Locsin sa pagka-alkalde sa banwa sang Janiuay.
