Ginsaysay ni Punong Barangay Rodrigo “Boy” Dellomes sang Don Esteban, Lapuz, ang natabo nga pagkomprontahanay nila ni Punong Barangay Felix Ventura sang Sinikway, Lapuz.
Sa amo nga insidente nga natabo sa Don Esteban, ginpahayag nga nakit-an si Ventura nga nagkuha sang iya pusil.
Sa interview sang Bombo Radyo kay former Punong Barangay Rodrigo “Boy” Dellomes sang Don Esteban, Lapuz, iya ginpahayag nga nagsumalangay ang ginamaneho nila nga mga salakyan kun sa diin makitid lang ang dalan.
Suno kay Dellomes, nauna ini nga nagsulod sa dalan kag kapin 30 metros na ang distansya nga nasulod sini sang nagsugata man ang salakyan nga ginamaneho ni Ventura.
Pahayag ni Dellomes, sang nagtabuay na ang ila mga salakyan, didto na nagtaas ang tingog ni Ventura kag may ginbuy-an ini nga indi manami nga tinaga.
Suno pa kay Dellomes, sang naglampas na ang salakyan ni Ventura, nakit-an nga may ginkuha ini nga pusil kag ginsiling pa nga kun wala lang ini sang kaupod, gintiro na niya ang anay punong barangay.
Gin-ako naman ni Dellomes nga may yara gid man sila sang nauna na nga indi paghangpanay bangud sa boundary dispute sa ila barangay.
Sa pihak sang isyu, gin-athag niya nga wala man ini sang kaugot ukon dumot kay Ventura apang suno sa iya, nahibaluan niya nga akig ang amo nga opisyal sa iya.
Sa subong, wala pa nakaatubangay ang duha para istoryahan ang natabo.
