Iloilo – Nadakpan na ang anay myembro sang Philippine Marine Corps kag No. 1 Most Wanted sa Western Visayas bangud sa serye nga kaso sang rape.
Ang arestado amo si Julito Chua Porras, 62 anyos, kag residente sang Primitivo Ledesma Ward, Pototan, Iloilo.
Sa interview sang Bombo Radyo kay Police Colonel Noel Aliño, officer in charge sang Iloilo Police Provincial Office, iya ginpahayag nga sang tuig 2019, ginhimuslan sang suspek sang makapila ka beses ang 16-anyos nga biktima.
Suno kay Aliño, masobra tatlo ka tuig nga nagpanago si Porras kag nadiskubrehan nga nagatinir sa Laguna.
Sang natukiban sang kapulisan ang lokasyon sang suspek, gilayon nga ginsundan ini kag nadakpan sa Barangay Niugan, Cabuyao, Laguna.
Nahibaluan nga nagaserbe pa anay si Porras sa Philippine Marines apang ginpahalin.
Sa subong, preso na ang suspek sa Pototan Municipal Police Station.
