JANIUAY, ILOILO – Wala na sang may mahimo nga legal remedy si anay Janiuay, Iloilo Mayor Frankie Locsin matapos nga ginpamatbatan sang Korte Suprema sang perpetual disqualification kag pagkapreso bangud sa kurapsyon.
Ini ang nangin pahayag sang independent lawyer nga si Atty. Noel Palomado sa interview sang Bombo Radyo.
Suno kay Atty. Palomado, final and executory na ang desisyon sang Korte Suprema nga paboran ang guilty verdict sang Sandiganbayan batok kay Locsin.
Sa pagkamatuod suno kay Atty. Palomado, hulaton na lang ni Locsin ang kopya sang desisyon kag ang pagpatuman sini.
Indi naman kinahanglan suno kay Atty. Palomado nga magpaguwa sang mandu ukon deklarasyon ang Commission on Elections (COMELEC) tuhoy sa disqualification ni Locsin sa pagka-alkalde sa Janiuay, Iloilo santo sa pamatbat sang Korte Suprema.
Bisan ang Sandiganbayan ang indi man makapaguwa sang Writ of Execution bangud nga maathag sa desisyon sang Korte Suprema nga napetsahan Marso 20, 2019 nga pinal na ang nasambit nga verdict batok sa anay alkalde.
Bangud sini, mahimo suno sa abogado nga may yara sang substitution nga matabo sa kandidatura ni Locsin santo sa pagsulundan sang COMELEC.
