ILOILO – Magapasaka sang motion for reconsideration si anay Maasin, Iloilo Mayor Mariano Malones matapos ginpamatbatan nga guilty bangud sa maanomaliya nga pagbakal sang liquid fertilizer sang 2004.
Sa ginpalab-ot nga mensahe ni Malones sa Bombo Radyo, iya ginpahayag nga magaapelar siya sa Sandiganbayan agud mabaliskad ang desisyon.
Nagpamalibad ang anay alkalde nga maghatag sang dugang nga pahayag tuhoy sa ginapangatubang nga kaso.
Sa ginpaguwa nga desisyon sang Sandiganbayan 7th division, nagaguwa nga guilty si Malones, kaupod sanday anay municipal accountant Cecilio Montefrio kag acting municipal accountant Jimmy Borra bangud sa maanomaliya nga pagbakal sang minilyon ka pesos nga liquid fertilizer nga wala nag-agi sa public bidding.
Magluwas sa pagkapreso, ang tatlo ang ginsilutan man sang perpetual disqualification sa pagpamuno ukon pagtrabaho sa bisan ano nga public office.
Ang Office of the Ombudsman ang nagpasaka sang kaso sang 2016 bangud sa paglapas sang tatlo sa Section 3 (e) sang Republic Act 3019 ukon Anti-Graft and Corrupt Practices Act.
Ang tag-iya sang Feshan Philippines, Inc. nga si Jose Barredo Jr. ang nagserbe nga state witness batok kanday Malones, Montefrio kag Borra.
