ILOILO CITY – Nagtudlu-anay ang duha ka durugista matapos nadakpan sa buy bust operation sa Brgy. Luna, La Paz, Iloilo City.
Ang mga arestado amo ang magbarkada nga sanday Ruztan Castañeda, 36 sang Brgy. Cabanbanan, Oton, Iloilo kag ginapahayag anay asset sang National Bureau of Investigation kag si Dixie Deñosa, 27, sang Brgy. San Isidro, Jaro, Iloilo City.
Nakuha kay Castañeda ang apat ka dalagku kag apat ka magamay nga sachet sang suspected shabu, drug paraphernalia, P5,000 nga buy bust money, .380 pistol nga may magazine kag 7 ka bala, identification cards, NBI badge, plastic canister kag coin purse.
Sa interview sang Bombo Radyo kay Castañeda, iya ginpahayag nga ginduhol lang sa iya ni certain Jojo ang bagahe samtang si Deñosa ang nagsugo sa iya nga kuhaon ang bagahe.
Suno kay Castañeda, nagaduda na siya nga daan nga illegal drugs ang unod sang bagahe apang hinali siya nga gindakop sang mga katapo sang Regional Drug Enforcement Unit kag La Paz PNP.
Samtang, gintudlo naman ni Deñosa nga si Castañeda ang nagsugo sa iya nga kuhaon ang bagahe gikan kay certain Jojo.
Suno kay Deñosa, halin pa sa Metro Manila ang supply sang illegal drugs.
