ILOILO CITY – Preso ang isa ka anay Overseas Filipino Worker (OFW) matapos madakpan sa buy bust operation sa Gustilo, Lapaz, Iloilo City.
Ang arestado amo si Edison Alfeche Gayuma, 39 anyos sang, kasado kag residente sang South Fundidor Molo, Iloilo City kag temporaryo nga nagapuyo sa Gustilo, Lapaz, Iloilo City.
Sa interview sang Bombo Radyo kay Police Lieutenant Paul Vincent Pendon, team leader sang Regional Drug Enforcement Unit (RDEU), iya ginpahayag nga nakuha nila sa posisyon ni Gayuma ang lima ka sachets sang suspected shabu kag P5,000 nga buy bust money.
Suno kay Pendon, nagakuha si Gayuma sang suplay sang shabu sa Banago, Bacolod City.
Nagapangatubang naman ini sang kaso nga paglapas sa Republic Act 9165 ukon Comprehensive Dangerous Drugs Act.
Nahibaluan nga si Gayuma ang napreso na sadto bangud sa kaso nga rape sang 2016 kag nakagwa lang sang 2018.
