ILOILO CITY – Suportado sang iya pamilya si anay Presidente Rodrigo Duterte sa tion nga magdesisyon ini nga magpadalagan para sa masunod nga eleksyon.
Suno sa iya anak nga si Vice President Sara Duterte, kun ano man ang desisyon sang anay presidente, bug-os ang ila suporta kaangay sa kun paano ini nagsuporta sa desisyon nila nga mga mag-utod.
Sang nagligad nga semana, nagpaandam ang anay lider sang Pilipinas nga posible ini nga magbalik sa politika sa tion nga padayunon sang mga kritiko ang plano nga pag-impeach sa iya anak bangud sa issue sang confidential funds.
Sang weekend, ginpahayag man sang opisina sang bise presidente nga gina-imbestigaran na ang mga gina-alegar tikang sang House of Representatives nga kakason ini sa pwesto, butang nga ginpanginwala na ni House Speaker Martin Romualdez nga pakaisa sang presidente.
